By Kobus se gat staan die 3 bikes wat ons in Calitsdorp gesien het ook voor die deur. Ek is binne besig om te bestel toe die manne verby gestap kom. Ons groet en hulle hou verby. Toe ek buite kom staan hulle met Aidan en gesels. Hulle vra hoekom is sy motorfiets so vol gelaai en of dit dalk al sy Pa se bier is. Hy moet bietjie kyk, word daar geskerts. Hulle raak ernstig toe ek vra waarheen hulle op pad is. Hulle was op pad Hel toe maar het nou, op grond van die weer besluit om verby te hou. Daar word groot reen voorspel en hulle wil nie daar in en uit sukkel nie. Dis nuus vir my. Ons kan die wolke sien op die berg en weet dit kan dalk bietjie reen, maar as die manne dit wil afstel agv die reen moet ons dalk tweekeer dink?
Ek gaan gesels met Kobus. Ja sê hy, daar is reen aan die kom. Tot Woensdag toe, en sommer heelwat. Ek kyk op, YR en dit word bevestig.
Ek begin koud kry en gaan soek n trui om onder my baadjie aan te trek. Die drie manne staan by ons motorfietse. Ons gesels bietjie oor XR's en DR's ens. Een vra waar ons vandaan kom en sê sy Pa bly op Swellendam. Toevallig ken ek sy Pa goed en het net die vorige dag met hom gestaan en gesels, so kan ek hom op datum bring met die ou kêrel se welstand.
Oor n lekker ontbyt en n koppie of twee boeretroos besluit ons om maar te ry. As ons vasreen in die kloof dan is dit maar so en bly ons langer. Dit klink vir my nogal aanloklik want ek is regtig moeg gewerk na n harde jaar. Ek gaan maak reg met Kobus en na n kort geselsie vat ons pad. Swartberg uit. Die opporvlak is nou oorgedoen en daar is niks meer van die klip banke wat ek laas beleef het sigbaar onder die bo laag nie. Ons ry baie lekker en vinnig vinnig is ons bo.
Ons neem n paar fotos by die uitkykplekkie maar die mis is dik, jy kan nie veel sien nie. Ons ry oor die kruin sonder om te stop. Dis mis is dik so dis koud en sinneloos om te stop. Anderkant af. Die heerlike kronkel paadjie tot by die Gamkaskloof afdraai.
Dan begin die pret. Daar is klippe. Baie klippe.
Ek weet die eerste stuk is so maar vandag voel dit of dit net nie ophou nie. Die bouval wat halfpad aandui kom na wat baie lank voel. Die 150 is voor en laat hom nie stuit nie. Op n stadium is die twee heel van die pad af want daar kom n ryding van voor af wat nie plek maak nie. Hulle ry deur n sloot. Dis net arms en bene en bagasie wat rond hop. Dan swik die hele motofiets hard na regs. Ek skrik my lam. Die jokkie kry die spulletjie op n manier onder beheer maar toe is hy op die tweede sloot en die hele proses word herhaal. Hulle gaan maak n draai in die veld en kom terug op die pad waar hy summier n lekker wheelie trek. Ek dog. As dit nou ek was het ek eers moes stop om tot verhaal te kom en die ergste bewerasie onder beheer te kry.
Ons sukkel aan. Die pad is sleg, maar darem nie lewensgevaarlik nie. Ons haal n Prado in. Hy stop in die middel van die pad. Twee mense klim uit. Die vrou sien ons aankom en praat met haar man. Hy skud sy kop, hy gaan nie sy blink ryding uit die pad uit trek vir ons twee nie. Ons sukkel om verby te kom. Die klippe is nog meer en groter langs die pad.
Kort daarna is daar die paar driffies en ons stop by een. Dit begin nou weer warmer raak. Dis moeilik om te glo nie lank gelede nie het ons truie gesoek!
Ons bereik die laaste stuk, waar jy afsak in die kloof in. Ons stop so paar plekkies vir fotos en ry later deur die hek. Aidan maak so n MM93 buiging toe hy daar deur ry en is weg voor. Ek kry hom later by die kafee waar hy vir my sit en wag. Ons gaan in en raak aan die gesels.
Ja daar is baie reen op pad. Hulle het baie kansellasies gehad a.g.v. die reen en die aanmerkings op Facebook. Een van die kansellasies is n klompie motorfiets ryers van die Kaap af wat die Safari Kamp bespreek het so hulle gaan ons soontoe opgradeer. Kosteloos.
Daar is nie aandete vannaand nie, want dis net ons in die Kloof so ek koop maar n pakkie wors en n halwe brood sodat ons kan braai. Sy beduie hoe om by die Safari Kamp uit te kom en ons vat die pad. Ons kan ons oë nie glo toe ons die plek sien nie. In plaas van in ons tentjies in die reen slaap gaan ons elk in ons eie huisie kan slaap. Op n lekker bed!
![Professional First Aid Kit, Trauma First Aid Kit with Labelled Compartments Molle System for Car, Hiking, Backpacking, Camping, Traveling, and Cycling[New Upgrade]](https://m.media-amazon.com/images/I/41uCkwNilAL._SL500_.jpg)
