Die volgende dag (Maandag) het ek so 'n paar dinge wat ek die oggend op George moes reël, daarna vat ek die pad gou daar na ou ChrisL toe. Dit was maar N2 langs wat nie baie lekker was nie, veral toe die ou in die wit Range Rover met swart ruite (GP nommerplate natuurlik) met 'n sleepwa sonder nommerplate my amper van die pad af ry om voor te kom. Ek wys hy moet bietjie afslêk en nie so op my nommerplaat ry nie maar hy steur hom nie daaraan nie, hy wíl verby. Ek ry nie maklik in die geelstreep nie omrede mens daar maklik ysters en goeters optel wat jou papwiel gee. Ek ry toe teen die geelstreep sodat hy kon verbykom, maar nee, hy moet amper my handvatsel afry om verby te kom. Ek het sowat 140km/u gery en hy het met 'n helse spoed daar verby gekom. Ek skat hy moes so 160 - 170km/u gery het. Ek was moerig maar los hom dat hy sy ry kan kry. Maar ek kyk hom so, bullebak wat hy is, hoe ry hy omtrent almal van die pad af om verby te kom. Steek op die soliede wit streep verby, aankomende verkeer moet heel in hulle geelstreep ry sodat hy kan verbygaan.
Ek draai af Stilbaai toe en gaan drink lekker tee by Chris-hulle.
Soos altyd, is kuier by Chris en Amanda nooit 'n vinnige afêrre nie ;D. Daar word toebies, en soetkoekies en tee en en en aangedra en ons gesels té lekker. Die son trek al water toe ek daar weg is maar ek het lekker gekuier :thumleft:
En toe begin dit laasnag op George te reën.
Lyn Schroeder gaan my 800 sy 10 000km diens gee vanoggend maar hulle het vir my 'n leenfiets gereël, 'n Kalamata 800GS. Ek eet gou my ontbyt (piesangs en druiwe), dat ek 07h30 by die handelaar kan wees.
Dit reën nou aan en af maar Knysna se kant toe lyk dit asof dit swaarder daar reën. Ek ry toe af na die strand toe by Wilderness, en neem sommer so 'n paar kiekies daar.
Toe sak dit effe uit en onthou ek ek het my reënpak by die gastehuis vergeet :-\. Ek draai toe maar terug maar kom toe op die pragtige tonele by Kaaimansgat af.
Die Polloks is seker die grondeienaars wat die bruggie herstel het:
Dis bitter mooi daar en het ek sommer 'n uur of wat daar deurgebring.
Ek wou vir my 'n "Drybag" by Cape Union Mart gaan koop en toe ek by die mall stop, toe sien ek George is eintlik (Lego) leeuwêreld:
Ek het gehoop om so net na 10h00 by BMW weg te kom, maar hulle was eers so 12h00 met my fiets klaar. Sowat R1200 later, was ek oppie pad. Maar dit sous! Ek wou nog Montagupas terugry maar nou was dit al laat en die pas is seker goed nat toe besluit ek ek ry sommer teerpad plaastoe.
Hier van omtrent Kykoe, sak dit uit en ek stop om my reënpak aan te trek. Dis nat en skielik koud, sommer so 9ºC en die wind waai kwaai. Maar ek is warm en droog en ry lekker.
Daar naby Beervlei dam toe skyn die son weer effe maar ek sien daar is 'n weer aan die kom oor die Baviaansberge. My agterent is al effe lam gesit en ek besluit toe Oppivlak plaastal gaan my geld vir 'n roosterkoek en koffie nou maklik kan neem. ;D
Hulle het die oulikste klein Jack Russels daar en ek speel bietjie met hulle.
Die pad terug plaastoe, Aberdeen verby, waai die wind kwaai, amper so erg soos toe ek en Woody verlede jaar EC Bash toe is. Ek druk maar deur omdat daai weer nou sterk oppad Graaff-Reinet se kant toe is. Ek is net voor die weer hier op die plaas, maar net toe ek van die teerpad afdraai sien ek weer dié klomp - seker so 25 - Bloukraanvoëls wat rustig in die laatmiddag sonnetjie in die lekker groen veld wei.
Nou ja, ek hoop julle het lekker kiekies gekyk. My sitvlak is lam, my nek styf maar die lekker gewees en vanaand slaap ek in my eie bed :thumleft:
