Dag 6 - Stormsriviermond - Stilbaai. 320km - "Roll me away"
Dit is 'n vrydagoggend in Stormsrivier en ons het geslaap soos bome wat omgeval het. Ek sien die drom skuins voor ons huisie is omgegooi, ons weet van niks nie. Was dit 'n bobbejaan? Was dit 'n kaapse Kloulose Otter? Ek is gans te rustig om om te gee. Ek gaan maak vir ons elk 'n Nescafe Cappuchino sakkie neem stelling in daar op die hut se stoepie. Agter my hoor ek hoe bars die see se branders en voor my baljaar die loeries in die bome.
Vandag is 'n korter skof, maar ons kan ons tyd vat. Ons gaan kuier vir ons familie in Stilbaai, so daar is nie winkels om oop te vang of papierwerk by ontvangs nie. Ons kan dus ons tyd vat.
Ons weet egter dat die agterpaadjies toer gedeelte van die trip nou begin einde se kant toe staan. Ek kry 'n Whatsapp van Bettie & Wilmar, ons groot motorfietsvriende hier in die Kaap. Hulle kamp by Ebb & Flow North op Wilderness. Ons moet daar indraai, dan maak hulle vir ons 'n behoorlike brunch. Ek gaan my nie twee keer laat nooi nie en ek weet ook die tyd breek aan om die trip se stories te begin vertel.
Na ons koffie begin die groot inpak weer vir die tweede laaste keer. By die tyd het Anmar al lekker in roetine gekom met die goed regsit. Hoewel ons nog 'n week hier kon bly was ons ook lus vir die voorlaaste "road trip" gedeelte. Hierdie plek sien ons beslis weer.
Met vertrek vat ek soveel tyd as wat ek kan om tot by die hek te kom, later die N2 en ons draai af vir Bloukranspas. Daars twee goue reels van 'n bike trip vir my....geen Wimpy&Spurs nie en GEEN maar GEEN tolpaaie nie!
Op Bloukranspas kry ons 'n klomp bergfietsryers. Nugter weet alleen waarvandaan hulle moes kom....dalk Natures valley?
Hoewel hierdie pad pragtig is kan mens nie help om gemengde gevoelens te he nie. Hier was beslis 'n politiese moddergooiery aan die gang van wie die pad waar moes regmaak. Nou lyk dit vir my is selfs dit ook alles sommer net so gelos en niemand gee om nie. Al is hy "gesluit" sal ons hom nie meer vir veel jare kan ry nie. Aan die Ooskaap kant skiet die bome in die middel van die teer op en hy raak erg toegegroei.
Dit was vir my bitter moeilik om 'n foto van die nuwe brug te kon neem omrede dit so toegegroei was.
Hierdie is veronderstel om 'n nasionale monument te wees...dit is veronderstel om ook 'n tolpad te wees, slegs vir ligte voertuie en motorfietse. Die enigste een in SA waarvoor ek sal betaal om op 'n bike trip te ry. Ons weet egter dat ons regering glad nie omgee vir geskiedenis en erfenis nie. Die land is mos eers in 1994 gestig, een oggend toe is alle infrastruktuur mos net daar.
Na Bloukranspas sak jy af na Natures Valley deur die Grootrivierpas. Hy is darem in gebruik en word mooi onderhou. Jy kom later uit net so buite The Craggs, so 15km voor Plett. Net so skuins oorkant Goose Valley trek ons in by daai portugese bakkery vir 'n koffie stop, want die volgende skof na Wilderness is nie my gunsteling nie.
Nou begin die stuk van ons reis wat ek die meeste haat....die land se langste 60 zone. Om op enige dag van die jaar van anderkant Plett af tot in George te ry is 'n helse frustrasie. Dis een aanhoudende speletjie om te kyk watter van die dorpies die meeste spoedkameras kan wegsteek. Dan, wanneer jy wel 'n kort stukkie 80 zone of 100 zone kry is daar 'n antie in 'n Honda Jazz met 'n Corgie op haar skoot wat met haar Naaaisnaa nommerplaat op die streep sit en 60 ry. Dit is beter op 'n bike, maar die stringe wat agter die antie soos 'n lykstoet vorm is baie lank. In Knysna self staan die verkeer dwarsdeur die dorp, buffer aan buffer. Gelukkig kon ek hier bietjie lanesplit, want dis warm! Jy wil nie stilstaan nie.
As hulle ooit 'n tolpad wil bou wat sal aftrek kry dan moet hulle daar agter Simola om 'n snelweg staanmaak sodat mens net die verdomde plek kan misry. Dan kan Knysna se toeriste in vrede sit en oesters vreet en elke Auto Carriers lorrie wat daar vanaf Detroit-On-Sea die Kaap van Polotjies, Opel Corsas & Isuzu bakkies voorsien hoef ook nie deur die (wat voel soos) 17 robotte te sukkel nie.
Na 'n paar kragwoorde bereik ons uiteindelik vir Ebb & Flow waar die honger behoorlik gestil is. Dit is so lekker daar, ek dink ek boek ons sommer daar in vir Desember 2016.
Die kuiertjie loop lekker en dit raak naderhand middag, tyd vir groet en Geseende Kersfees toewens. Vanaf Ebb & Flow kan jy in die middel ook uitgaan en dan ry jy langs die Touwrivier se tot in die dorpie. Agter die hotel hou ek regs verby en ons klim 'n steil bult uit. Ons wou gaan kyk na die Map of Africa.
Oor die pad terug vanaf Wilderness gaan ek nie veel skryf nie, na Kaaimanspas en nog 'n paar spoedkameras daar net voor George het die gat begin lam raak en ons het op die dubbelpad geklim. Daardie wereld ken ek baie goed, ou pad ingesluit, ons wou nou net by ons bestemming kom. Na 'n kort bene rek by Mosselbaai se groot Engen was ons oppad Stilbaai toe waar ons die naweek saam met familie sou deurbring.
Die laaste skof terug huistoe sou dus eers die Maandag volg.
1) Inpaktyd op Stormsriviermond. Hierdie is ons bykans daaglikse ritueel.
2) Die begin van Bloukranspas
3) Die "nuwe" brug.
4) By vroutjie is bly om terug te wees in haar provinsie.
5) Van anderkant daai bruggie af is die pad in sy moer.
6) Honger vir daai kampkos en ook vir gesels.
7) Map of Africa
8) Die laaste 30km vir die dag breek aan.
9) My gunsteling serenity spot
Ek het julle rr vreeslik baie geniet. Baie lekker skryfstyl en mooi prentjies om dit af te rond. :thumleft: :thumleft:
