Langebaan Ladismith blitsretoer

[Amos]

Die reën van Vrydagaand wys homself hier in plasse wat al meer uitdagend raak.

 

[Amos]

By hierdie een steek ek eers vas om ondersoek in te stel. As ek op hierdie pad gestrand raak word ek seker eers oor ‘n week gehelp. Sommer met die naderstap leer ek die dag se les: ‘n Karoo grondpad het dikwels ‘n lekker gladde lagie klei op die bodem, wat jou nie veel pla in ‘n kar nie, maar met twee wiele moet jy lekker wees.

 

[Amos]

Ek trek kleinkoppie en ry om die plas, deur die veld en harde Karoo bossies, self nie te maklik nie, maar die ligte fiets maak dit doenbaar op my vaardigheidsvlak.

Na vele hekke en plasse bereik ek die “grootpad” tussen Matjiesfontein en Karoopoort, ook bekend as die Patatsrivierpad. Hoewel lank terug gery, is hierdie pad is meer bekend aan my en ek probeer bietjie vinniger vorder. Maar o wee, hier is net so baie plasse met die kenmerkende glibberige klei onder. Hier is spore van ander motorfietse ‘n dag of twee vroeër. Hulle was seker bietjie uitgedaag.

By Patatsrivier stop ek in die koelte van soetdoringbome neffens die werf. Geen sterfling is in sig nie. Gisteraand se gasvrou het mooi vir my padkos gesorg, koue braaivleis en toebroodjies. Dit sal my vat tot by die huis.

Die grootste plas kry ek voor die Perdekraal windplaas. Windkrag is goed maar jinne, dit was darem baie mooier toe ek laas hier verby is in suiwer Tankwa Karoo. Ek stop eers weer en neem bestek op. Geen omry hierdie keer moontlik en hy is lank. Hoe vinnig? Trapfiets het my geleer spoed is jou vriend en pak hom maar in tweede aan met hoë toere. Moenie so styf raak as die fiets bietjie gly nie, laat hom bietjie gaan, gebruik jou gewig, leer ek. Ek is deur en vanaf die windplaas is die plasse verby, die nuwe pad is te goed gebou. In April 1980 het ek en pa die eerste koue front van die winter gekry toe ons na sy familie toe is in Porterville. Dit was gly-gly om van die plaas tot op die teerpad te kom, maar pa het hom regop gehou.

By Karoopoort sien ek die eerste ander voertuig sedert Laingsburg. Hier neem ek natuurlik Swaarmoedpas eerder as Theronsbergpas. Dis omtrent ewe ver, maar ek kry darem ‘n stukkie grondpad in en kry geen vragmotors. By die teerpad stop ek om mooi na Vrydagnag se sneeu op Matroosberg te kyk en merk nou op hoe vuil ek is.

 

[Amos]

By Ceres gooi ek petrol in. My eerste maal in Ceres was ook op die 1980 toer en ek het toe gedink dit is die mooiste dorp in Suid-Afrika. Vandag weet ek nie meer wat is die mooiste dorp nie. Daarna lê ek maar net geduldig die besige teerpad af tot by Gouda. Hier is darem nog ‘n grondpadgeleentheid Moorreesburg toe. Hierdie pad is aanvanklik in ‘n besonderse goeie toestand. Ek stop my laaste stop by Leliedam.

 

[Amos]

Vanaf Moorreesburg is dit net teerpad tot by die huis, in ‘n wind met toenemende sterkte van voor. Ook nie die rooi merrie se sterk punt nie. Maar geen merrie het nie swak punte nie. Hierdie een is net wat ek in gedagte gehad het toe ek haar vroeër vanjaar gekoop het. Die indrink van die landskap met die oop lug rondom jou. Net soos wat pa daarvan gehou het. Ek is verlief op die merrie.

 

[Wolzac]

Amos, welkom hier, jy is 'n aanwins.

 

[Karoo Rider]

Amos.  Sê my waar was jy al die jare? Jou skryfstyl en mooi Afrikaans is so in my kraal.  Weliswaar voortreflik.  Ek sien uit na nog.  :thumleft:

 

[blockheadxl650v]

Lekker trippie. Dankie

 

[AfriqueDS]

Lekker RR en mooi geskryf

 

[stcomza]

Baie dankie, lekker saam gery en dit baie geniet  :thumleft:

 

[Dorsland]

Hoe lekker is dit nie om sulke pragtige suiwer Afrikaans te lees. En dít van 'n man wat ry en kyk en die wêreld inasem tot diep in sy binneste, waar dit vir later, wanneer dinge woel, weer opgediep kan word.

Pragtig!

 

[Skim]

Lekker Man!!! baie dankie - ek soek daai grondpad Robertson toe - deel bietjie!!

 

[EtienneBnk]

Voetspore virrie honne. Amos jy kan n nuwe tv-reeks begin my vriend.

 

[the ruffian]

I love the eloquence and philosophical cohesion of your report. Ek verstaan en waardeer jou styl, maar  ek kan nie so mooi my eie gedagtes in Afrikaans skryf nie ...

I am deeply moved by the way you evoke the landscape in terms of your recollection of traveling with your father ...

Like others who have responded above, your style of riding and writing resonates strongly with me.

Baie Dannie, Amos...

 

[Chrisl]

val ek in die pad

Man ek geniet jou skrywe terdeë en hoop om nog baie in die toekoms te lees.maar ek moet ten sterkste kapsie maak teen twee keer se gebruik van bostaande term!!! ;D :lol8:
Hier by Dustriders ontmoedig ons dadelik alle gaste om daardie term te gebruik wanneer hulle sê hul wil vertrek!!!  :thumleft:

Natuurlik sal ons fotos verwelkom van jou en pa se trip in 1980. :thumleft:

 

[blockheadxl650v]

Lekker Man!!! baie dankie - ek soek daai grondpad Robertson toe - deel bietjie!!

Ek ken van een grondpad. De Wet pad, Jy kan van die N1 naby De Doorns regs draai of jy kan die Overhex pad van van die hoofpad vat en dan ook regs draai Robertson toe.
Hy kom weer by Rooiberg wyn kelder by die hoofpad uit.

 

[Skim]

Dankie Sal hom nog soek

Sent from my SM-G996B using Tapatalk

 

[skydiver]

Jou RR lees baie lekker met al die gevleuelde woorde.
Afrikaans is sowaar 'n wonderlike taal.
Ek sien uit na die volgende avontuur op die CRF

 

[Vulcan]

Lekker om te lees, dankie. Ek het n paar nuwe paaie ontdek in jou skrywe.  :thumleft:

 

[Andre01]

Sjoe, dankie vir die lekker lees en mooi foto's. Maak 'n man lus om sommer nou op te klim en 'n draai te gaan ry!