Tussen Greylingstad en Val stop ons om die Vaaldam-Secunda pyplyn te bekyk.
Oorkant die pad is twee koeie in die moeilikheid (eintlik net een, die ander een het reeds die stryd gewonne gegee.) Dit gebeur maar dat hulle nie uit die modder kan kom nie.
Ons draai om en ry 'n paar kilometer terug op soek na die baas van die plaas. Ons gaan in by die hek teen die pad. Erg benoud nader ons die huis. As daai drie boerboele daar uitkom eet hulle ons en die skoetertjies vir brekvis op. Gelukkig bly die hek toe - daar is niks (mense)lewe nie.
By 1023 ken die tannie geen GF M...... by Greylingstad nie. "Wat van Balfour dalk?"
"Ja, maar nie GF nie. Sal JD dalk help?"
"Asseblief mevrou."
'n Paar oproepe later:
"Is dit mevrou M...."
"Ja..????"
"Ag mevrou, my naam is J..... Ek hoop u kan help. Dis 'n langerige storie, maar ek sal probeer kort wees"
"Ja..????"
"Mevrou, ons is op 'n plaas hier naby Greylingstad. Die bordjie sê 'GF M.....'. Hier is twee koeie in die moeilikheid. Hulle sit in die modder vas en kan nie uitkom nie. Een is nog lewendig, maar een is reeds dood. Ken u dalk die mense?"
'Ja, dis my man se broer. Hulle is nie die naweek daar nie, hulle is by die see. Ek sal my man stuur om te gaan plan sien. Ons bly 20 minute se ry van daar. Baie dankie dat jy gebel het, en dat jy bereid was om soveel moeite te doen. Jy weet beeste is baie duur. 'GF' sal jou bel sodra hy terug is. Jou nommer is op my foon."
"Dis 'n plesier, mevrou. Jammer dat ons nie méér kan doen nie. Ons ry met motorfietse, dan is 'n ou se hande maar afgekap."
"WAT??. Ons 'like' julle 'bikers' mos niks. En hier kom julle en doen nogal iets 'greats'. Ek is verbaas!!"
"Ag mevrou, onder die valhelm is ons almal maar gewone mense. U kan ons gerus beter leer ken."
"NeeWat, gee julle net TWEE doppe, dan raak julle mos WILD......!"
"Ag mevrou......"
Die laaste van die kosmos op pad terug.
