Merweville

[Karoo Rider]

Merweville.  Hoeveel keer het ek jou nie al deurkruis nie? Bo van Theekloofpas se rigting. Die mooie Rammelkoppas. Vanaf Koupstasie of sommer met die plaaspaaie vol skaapspoortjies.  En toe nou die keer – met die grootpad.  Netjies geteer vanaf Prins Albert Stasie.  Die keer ry ons nie deur nie.  Ons bly oor.

Dis warm.  Dis tjoklits-in-die-yskas-hou warm.  ‘n Vriendelike gesig agter die kafee-toonbank word inderhaas met ‘n masker bedek.  “Al die pad van Ladismith af?  My jinne.  Ek hoor dis so mooi daar.  Ek was nog nooit daar nie”  Loslekkers in koerantpapier.  Kerse en blouseep.  Niks, maar alles.

My roomys se sakkie val uit my hand uit.  Vir ‘n oomblik is die silwerskoon strate bederf soos ek in die koggelende bries agter hom aanskarrel.  ‘n Seun groet in die verbygaan.  Behendig agter die stuur van ‘n te-groot dikwielfiets.  Droë beurtwaterslote wat geduldig wag op hul beurt.  Peperboom en olyf.

En dan is daar die kerk.  ‘n Argitektoniese meesterstuk uit klip.  ‘n Rots.  Hoeveel keer is daar binne nie al gesoebat, en ontvang nie.  Getreur op ‘n begrafnis, en gejubbel by ‘n doop.  Sy horlosie tik geduldig.  Sy weerhaan soekend na die wind.

Kinders baljaar.  Dis die geluid van vreugde wat net ‘n swemdam kan bring.  ‘n Lafenis in die middagson, diep uit die aarde.  Met kreun en steun beur die windpomp voort in sy taak.  En dan, amper skielik, kom die koele aandlug op.  Die windpomp kry opnuut lewe.  Hy dans en swaai.  So ook sy maats in die omgewing.  ‘n Dolle gejaag na wind.

Uitgebrande kole.  Dof in die as neem die sterrehemel by hul oor.  Stoepsit.  Stilsit.  Nog net so klein rukkie asseblief.  Maar ek het genoeg.  Meer as genoeg.  Merweville.

 

[Lem]

hier kom 'n eersteklas skryfstuk  :deal:

gooi gerus  :thumleft:

 

[Karoo Rider]

Weet nie of dit tel as 'n RR nie, was die naweek daar met die gesin met die bakkie. Dis 'n plek wat my na aan die hart lê sedert Chris Louw my die eerste keer daar verby geneem het op een van ons bike trips.  :thumleft:

 

[Karoo Rider]

hier kom 'n eersteklas skryfstuk  :deal:

gooi gerus  :thumleft:

Jammer Lem dis maar dit! Sommer 'n bevlieging gekry aangesien ek so lanklaas 'n ou ietsie getik het!

 

[Grunder]

hier kom 'n eersteklas skryfstuk  :deal:

gooi gerus  :thumleft:

Jammer Lem dis maar dit! Sommer 'n bevlieging gekry aangesien ek so lanklaas 'n ou ietsie getik het!

Maar dit was wragtag pragtag getik  :thumleft:

 

[hando]

Demmit - tik nog .

Jy is duidelik n woordsmit.

 

[FrancoisTz]

Ry asseblief meer sodat ons meer kan lees. Uitsonderlike gebruik van woorde.

 

[Crankshaft]

Jissie dis darem vir jou mooi plekkie daai

 

[Challa]

Net so mooi verwoord as wat daardie wereld is.

Ons is self Desember daar deur via die grondpad net buitekant Laingsburg. Dit was goed om te sien hoe le die water in die driwwe.

 

[Noneking]

Baie mooi!

 

[Black_Hawk]

Merweville is 'n baie besonderse dorpie. Baie dankie vir die deel en vir jou mooi bewoording  :thumleft:

 

[Vis Arend]

Pragtig geskryf, jy het net die honde wat jou jaag uitgelos.  :biggrin: 

Ek is ook al paar keer daardeur, en elke slag was daar 'n hond of twee wat al keffend agter ons aangehardloop het.    :lol8: 

 

[Karoo Rider]

Pragtig geskryf, jy het net die honde wat jou jaag uitgelos.  :biggrin: 

Ek is ook al paar keer daardeur, en elke slag was daar 'n hond of twee wat al keffend agter ons aangehardloop het.    :lol8:

Dankie Visarend, nee darem geen jaende honde die keer nie!  Die mense langsaan het wel 'n trop van drie worshonde gehad. My innige simpatie - ons het self een en dis genoeg.

 

[Leo]

Pragtig geskryf, jy het duidelik 'n slag met woorde.  :thumleft:

Ek gaan eendag op Merweville aftree. Die dorpie maak 'n blywende indruk op 'n mens.  :3some:

 

[stcomza]

Baie mooi geskyf - sit nou met heimwee in my gedagtes... :thumleft:

 

[Neo_za]

Na so n mooi beskrywing het ek Merweville op die bucket list gesit :thumleft:

 

[Mev Vis Arend]

Karoo Rider, jy skryf huil-mooi.  :thumleft:

 

[BullSmit]

Baie mooi beskrywing!

Ook sommer op my lys.

Jy sal met jou talent mense laat uitsien om Boksburg te besoek!.  :biggrin:

 

[2StrokeDan]

Pragtig geskryf Boerneef!!

Ons was so n 5 jaar terug op Merweville se jaarlikse kerk fondsinsameling, en wat n belewenis. Die koektafel was in n uur of twee uitverkoop, en dit alleen het R23000 ingebring.

Pasop net vir Jacques, hy is Merweville se burgemeester. ot:

 

[petri oosthuizen]

Mooi Kerk!!!!!!!!!1 :drif: :drif: