Ag, nou ja, so kom alles wat lekker is tot 'n einde. Donderdag, 13 Okt, vroeg oggend is ons reeds oppad. Ons ry so 7-8km teerpad, terug in Bulawayo se rigting, en draai toe op 'n grondpad wat ons 85km se draai spaar na Plumtree, sou ons teerpad gery het tot in Bulawayo. Die grondpad was nie te sleg nie, maar het redelik baie beeste op gehad. Te gou kom ons in Figtree uit, op die hoofroete tussen Bulawayo na Plumtree.
Vinnig is ons in Plumtree, en woerts deur die Ramo Gwebane grenspos. Dit was lekker om net die vorige entry se dokumente te wys en deur te ry. Ons het toe ons op 1 Okt Botswana ingegaan het, 'n dual entry gedoen, wat al die formaliteite by customs skip, as jy weer in Bots ingaan.
Ons het so stadig as moontlik gery, wel ons was forseer, want 'n splinter nuwe teerpad is reeds gegooi na Francistown, maar jy mag net 80km/h ry, en glo my, daar was 'n speed trap op daai pad. As 'n motor my nie gewaarsku het nie, het hulle my seker weer gevang.
In Francistown is ons reguit Marang Hotel toe, waar ons reeds met die vorige deurry, besluit het om te slaap. Hulle het 'n lieflike kampplek. Ons was ewe windgat, ry sommer reguit kampplek toe, slaan die tent op, pak af en gaan toe eers om te hoor of ons daar mag slaap. Hierdie tipe lewe kan mens baie gemaklik maak. Weer was dit swem, drink, eet, lê en gesels oor die 2 weke wat verby is en die laaste 600km wat voorlê huistoe more.
Die aand het ons by Mma Afrika restaurant gaan eet. Dis so 3km van die hotel af, by 'n garage en winkelsentrum. Dit word bedryf deur Gerda, 'n oud SAner, wat so 3 maande gelede oopgemaak het. Die lekkerste rib eye steak wat ek in my lewe geëet het. Maak gerus daar 'n draai wanneer julle weer deur Francistown ry of daar oorbly. Njam njam!!
By al die plekke waar ons gekamp het, was dit net ons en miskien een ander groepie mense. Maar hier by Marang was uiteindelik 12 motorhomes met Hollandse pensioenarisse wat oorgeslaap het, 2 tente vol kerkmense wat oppad na Zim was om sendingwerk te gaan doen en nog 3 tente met kontrakwerkers in. Dit het ons half paniekerig laat voel, te veel mense, te besig .....!!
Geniet net die fotos.