Een HELse lekker naweek

[Lem]

Dagse almal

Met die Maart skoolvakansie wat die 18de sou aanbreek wou ons weer 'n bietjie wegbreek.

My aanvanklike plan was om weer die kampgoed af te stof, die CRV in te span en paar Sanparke soos Karoo, Camdeboo & Bergkwagga te gaan besoek. Dit sou nou ons oog lekker inkry vir Kruger Wildtuin in Julie, maar ek moes ook my verlof dophou, want hierdie jaar is nog lank. Die naweek wat die skole sou sluit sou dus perfek uitwerk vir 'n vinnige, veel korter, wegbreek.

Een aand pitch ek die idees vir Anmar en sy kom op met 'n voorstel wat ek nie sommer van die hand kon wys nie.

"kom ons ry weer met die bike...dan gaan wys jy my Die Hel"

Ek was in 2009 laas daarheen, op my heel eerste adventure bike trip. Sedertien is ons al 'n paar keer oor Swartbergpas met die CRV, maar ons het weens tydbeperkings maar altyd verbygehou by die Gamkaskloof bordjie.

Nader aan die tyd begin ek verblyf te soek en die aanvanklike plan was om onder in Gamkaskloof te slaap. Dit was seker so drie weke voor die vakansie sou aanbreek, maar die huisies, karavane & tente in die kloof is uitgeboek vir daardie naweek.

Net daar besluit ek om eerder in Prince Albert te gaan oorbly, maar selfs dit het nogals moeite gekos. Daardie dorpie is beslis die Franschoek van die Karoo. Twee weke voor die tyd gaan ek op die Lekkeslaap webwerf en uit 44 gelyste gastehuise kry ons verblyf bly slegs 3. Ek is bly dit het sou uitgewerk, want om uit die Kaap uit tot onder in Die Hel te moes ry vir 'n dag sou maar net 'n gejaag afgee. 

So val die trip inmekaar in...

Skole sluit die vrydag, na die besige kwartaal kan my vroutjie lekker uitrus en ons vertrek Saterdagoggend vroeg na Prince Albert.

Sondagoggend ry ons vanaf Prince Albert oor Swartbergpas, af en uit Gamkaskloof en ons gaan bly oor op Diaz Beach by vriende in hul woonstel.

Maandagoggend toer ons weer huistoe.

At dawn we ride 

 

[Lem]

Saterdagoggend breek aan en daar heers groot opgewondenheid in die huis.

Hierdie is 'n korter uitslaaptrip en ons prober om sommer alles in die twee Wolfman silos te kry. Links vir Anmar, regs vir my.

So omstreeks 06h30 was dit nog bietjie donker, maar ons was gereed vir aksie.

Die roete vir die dag klink nie na veel nie, maar gaan toer hom maar op 'n stil oggend. Dis eintlik nogals lekker.

Eerste stop was orie Du Toitskloof na Worcester se nuwe Ultra City by Vida Café. Van hier af toer ons na Touwsrivier vir ontbyt by Steers. Net so 85km later is ons by Matjiesfontein. Dit was nog lekker vroeg en ons kon die dorpie lekker deeglik deurloop. Dit was ons tweede besoek, maar in daardie Transport Museum kan jy my los vir 'n dag. Ek is mal oor sulke goed.

Na Matjiesfontein was dit 'n kort skof na Laingsburg waar ek sommer weer volgemaak het. Hierna die aaklige skof na Prince Albert Road waar ons afdraai vir die laaste 45km. Ek meen aaklige skof, want op daardie pad haak al die motoriste en veral lorriedrywers se koppe mos uit. Vir my eie veiligheid het ek maar eerder die hele 90km in die geelstreep gery, want op elke dubbelstreep van voor af was daar n trok in my baan.

 

[Lem]

Hier volg nog n paar Matjiesfontein & Prince Albert Hoogtepunte.

Ons huisie vir die aand was Yaddah gastehuis. Was maar R 550 vir die aand en was pragtig skoon en luuks.

Ons het in die namiddag die dorpie gaan verken en sommer die aand by die Swartberg Arms langs die hotel gaan eet.

 

[Lem]

Nog Prince Albert

 

[Lem]

Na 'n goeie nagrus breek sondagoggend aan. Tyd vir die grondpad om aan te breek.

Die plan was om vroeg te roer, want ek is maar skrikkerig om baie verkeer van voor af te kry op die Gamkaskloofpad.

Om 07h00 laat ons die slapende dorpie agter en ons begin om die Swartbergpas te klim. Met 'n paar fotostoppe vorder ons tot by die Gamkaskloof afdraai in presies 45 minute. Tyd vir n vinnige benerek voor die laaste 37km aanbreek. Die plan is om te gaan piekniek onder in Die Hel en die koffiebottel, volstruisbiltong en ander versnapperinge was bo in die regterkantse sakkie.

Ek is mal oor Swartbergpas, dit is voorwaar 'n meesterlike pad. 

Saam met fotostoppe het ons mooi tot onderkant Elandspas in twee ure gevorder. Op Elandspas was ons tydsberekening net reg, want ons moes reeds voor 10h00 al drie voertuie van voor af laat verbyskuur.

 

[katana]

Ek ry saam.  Die Hel sit hoog op my bucket list.  :ricky:

 

[Lem]

Onder in Die Hel aangekom en die honger begin te knaag.

Na 'n lekker piekniek was dit weer tyd om die pad uit te trotseer. Dit het eintlik baie maklik gegaan omrede die pad in goeie toestand was.

Oja, oppad in het ons n groot groep bergfietsryers gekry wat hulle eie "to hell & back" naweek gereel het. Ek moet se....om dit te kan doen is na die naweek nogals ingepotlood op my bucket list. :deal:

Die pad uit na Swartbergpas toe het goed gegaan. Ons het dit in slegs 'n uur en 'n kwart kafgedraf. Paar laaste fotos by Die Top & die uitkykpunt aan die Oudtshoorn kant en dit was tyd vir 'n behoorlike Sondag middagete stop by Wilgewandel.

'n Deeglike skep Volstruisbobotie, geelrys, groente & pampoentert .... vir slegs R 65.

Na ete het ons maar die kwaai wind van voor af aangevat na Mosselbaai. Ons het nie weer vir fotos gestop nie. Op Oudtshoorn was ek weer verbaas met die 800tjie se petrolverbuik. Ek het hom die vorige dag op Laingsburg volgemaak, was Prince Albert toe, oor die pas, af en uit die Hel en tot op Oudtshoorn....alles op iets soos 13 liter. Bargain!


Op Robinsonpas het ons darem paar Buff-gangers van voor af gekry. Hoop maar die manne het almal mooi veilig weer die huis gehaal.

 

 

[Jakkals]

Lekker, nice RR  :thumleft:

Ek was al so baie in die Hel gewees met bike en cage en elke keer as ek uit kom sê ek vir myself ek is nou al gatvol vir die plek maar as ek my kan kry dan is ek weer daar, dit is maar een van daai plekke wat jy nie net in en uit moet ry nie maar moet oorslaap om die stilte te waardeer, vakansie tyd bly ek weg, te besig en raaserig in die aand.

 

[Lem]

Lekker, nice RR  :thumleft:

Ek was al so baie in die Hel gewees met bike en cage en elke keer as ek uit kom sê ek vir myself ek is nou al gatvol vir die plek maar as ek my kan kry dan is ek weer daar, dit is maar een van daai plekke wat jy nie net in en uit moet ry nie maar moet oorslaap om die stilte te waardeer, vakansie tyd bly ek weg, te besig en raaserig in die aand.

Dankie Jakkals. ja nee, ek hoor jou. So mooi soos dit is, kan ek ook nou weer 'n paar van daai passe af wegbly, maar plekke soos Wilgewandel & Prince Albert maak 'n baie goeie indruk op my. Vir hulle sal ek sommer nog baie wil besoek.  :thumleft:

Iets wat ek bitter graag wil doen is om my lyf toeris te gaan hou daar in Oudtshoorn en ek wil graag al daai diere plekke besoek. Ek was byvoorbeeld slegs as seuntjie van 8 jaar oud een keer by Kango Grotte. So daar is moet nog talle Klein Karoo trippies gebeur.  :thumleft:

 

[Jakkals]

Lekker, nice RR  :thumleft:

Ek was al so baie in die Hel gewees met bike en cage en elke keer as ek uit kom sê ek vir myself ek is nou al gatvol vir die plek maar as ek my kan kry dan is ek weer daar, dit is maar een van daai plekke wat jy nie net in en uit moet ry nie maar moet oorslaap om die stilte te waardeer, vakansie tyd bly ek weg, te besig en raaserig in die aand.

Dankie Jakkals. ja nee, ek hoor jou. So mooi soos dit is, kan ek ook nou weer 'n paar van daai passe af wegbly, maar plekke soos Wilgewandel & Prince Albert maak 'n baie goeie indruk op my. Vir hulle sal ek sommer nog baie wil besoek.  :thumleft:

Iets wat ek bitter graag wil doen is om my lyf toeris te gaan hou daar in Oudtshoorn en ek wil graag al daai diere plekke besoek. Ek was byvoorbeeld slegs as seuntjie van 8 jaar oud een keer by Kango Grotte. So daar is moet nog talle Klein Karoo trippies gebeur.  :thumleft:

Oudtshoorn  is 'n groot toeriste aantraksie, nie net local nie maar ook vir oor see se toeriste. 

 

[Lem]

Maandagoggend breek aan op 'n gryse Mosselbaai waar die motreentjie saggies op die braaikamer se PVC dak val.

Ons was nie meer gedrulk om vroeg te ry nie en kon sommer eers lekker smul aan twee koppies koffie en beskuit voor ons die sakkies weer gaan inlaai het.

Weens die reen het ek maar besluit om op die N2 te hou sover as moontlik. Die Cloetespas en daai lekker agterpaaie moes maar wag, want die verslae was dat dit wyd die nag gereen het. By die grondpaadjies langs die N2 het boere met hulle modderbeplakte bakkies uitgekom, so ek was bly oor my besluit.

Ons het klein vlaggies motreen gehad tot by Riversdale waar ons gaan ontbyt eet het by La Bella daar langs die Rooi Alwyn/Bali Trading.
Hier het 'n mini wolkbreuk uitgebreek net voor ons wou vertrek, so ons het nog sommer lank rondgehang tot die ergste oor was.

Net gestop op Buffeljags vir volmaak en aangehou met aanstoot tot op Riviersonderend en later Dassiesfontein waar ons lus was vir hot chocolate.

Op Menseregtedag was Dassiesfontein egter 'n miernes. Ons was op 'n waglys vir 'n tafel. Om die die pragtige 1959 Chevy Bel Air in die parkering te kon bewonder was darem vir my die stop werd.

Net hier het ons besluit om daardie hot chocolate in Franschoek te gaan drink. Ons het op die R43 na Villiersdorp gedraai en soos met ons laaste lang trip die "shortcut" oor Draaibergpad agter die Theewaterskloofdam om geneem. Van hier af natuurlik die Franschoekpas en ons kon die trip ordentlik afsluit by BICCCS.

Van hier af het ons 50km tot by die huis op 'n bekende pad en ek kon die rieme neerle.

Hierdie kort, maar kragtige trippie het vir my laat voel asof ek veel langer as twee nagte uitgeslaap het.

Wat dit lekkerder gemaak het is dat dit eintlik Anmar se idee was.

Ons hoop om nog honderde road trips mee te maak.  

Alles is egter net genade van Bo waarsonder geen van hierdie vet pret reise moontlik sou wees nie.  :thumleft:

 

[Bokveld]

  Julle vat nie nonsens van n vinnige trip nie.Kom drink n slag koffie as julle weer in my kontrei is.

 

[FrancoisTz]

Wonderlik, julle ry lekker en eet lekker. Hoop die glase het darem 'n Brandewyn en Coke bevat dan beteken julle het ook lekker gedriink, dit is nou ook saam met die lekker koffie. Dankie vir die deel.

 

[Black_Hawk]

Weereens 'n baie nice RR met mooi foto's  :thumleft:

 

[woody1]

Lekker.  Dankie vir die deel.
Maar soos Jakkalasie se... mens moet daar onder in die Hel slaap.
So 'n paar jaar terug oppad van die EC Bash het ons ook daar tent opgeslaan.  Vuurtjie gemaak en lekker gekuier.
Die jaar gaan grootseun en vrou weer saam EC Bash toe en ons beplan om weer 'n aand daar oor te slaap

 

[Matewis]

Lekker Louis!! Sien nou uit na einde April!

 

[Black_Hawk]

Lekker Louis!! Sien nou uit na einde April!

+1, kan ook nie meer my lus inhou nie

 

[Lem]

Wonderlik, julle ry lekker en eet lekker. Hoop die glase het darem 'n Brandewyn en Coke bevat dan beteken julle het ook lekker gedriink, dit is nou ook saam met die lekker koffie. Dankie vir die deel.

:lol8: weet jy wat Francois? Mens kry mos soms, net soms daai lus vir RUM ..

Ek vra toe vir Kaptein Skuim, maar toe het hulle net Rooihartjie  :snorting:

so ja, daai was Rooihartjie & Coke in beide glase :thumleft:

 

[Lem]

Lekker.  Dankie vir die deel.
Maar soos Jakkalasie se... mens moet daar onder in die Hel slaap.
So 'n paar jaar terug oppad van die EC Bash het ons ook daar tent opgeslaan.  Vuurtjie gemaak en lekker gekuier.
Die jaar gaan grootseun en vrou weer saam EC Bash toe en ons beplan om weer 'n aand daar oor te slaap

Thanks Woody  :thumleft:

Ek het darem daai voorreg in 2009 gehad. Oor beide passe in die reen en deurie modder. Het in 'n klein tentjie geslaap. Dit het beslis 'n bekoring. Maar ag wat, vir hierdie trip was ek eintlik bly dit het uitgewerk dat daar nie juis verblyf was nie. Ons het heerlik op Prince Albert gebly, my vrou het gesien wat sy wou sien en ons was nie gedruk vir tyd nie.

Maar eendag as ek weer met die kar gaan met my bergfietse agterop sal ek vroeg genoeg boek sodat ek daaronder in n huisie kan bly. Ek wil beleef hoe donker en stil dit daar kan raak.  :thumleft:

 

[Man from Nam]

Dankie Lem, weer 'n lekker RR
Nou verlang ek darem self na ons trippie laas Desember.
Dankie vir die deel en mooi foto's