Karoo Rider
Race Dog
- Joined
- Sep 1, 2012
- Messages
- 1,874
- Reaction score
- 903
- Location
- Ladismith WC
- Bike
- Honda CRF-1100L Africa Twin
'n Geruime tydtjie gelede het ek al Slingsby se "Overberg" kaart vir my aangeskaf, want in die area tussen Witsand en Gansbaai, tot noord teen die N2, was ek nog nooit vantevore nie. Skoonma het 'n paar dae by die familie op Bonnievale gekuier, en met ons wat haar weer moes gaan haal het kom ek gou tot die besef dat dit nou my kans is.
So gisteroggend vroeg is vrou en kinders met die Atos, en ek met die motorfiets, hier deur en op Barrydale draai ek weg oor die Tradouwspas. Graag sou ek darem dié pas wou gery het in die dae toe dit nog grondpad was. Natuurlik gebou deur pasmeester Thomas Bain, van 1869 tot 1873.
By Buffeljags blaas ek solank die bande 'n knertsie af, en kort daarna vurk ek links uit op die Malgas pad. Vaalbruin saailande en 'n paar skaap hou my geselskap voordat die pad skielik afkronkel na die groen rivieroewer. Malgas Pond. Eers 'n Volkswagen kombi met Gautengse toeriste wat oorgetrek word, dan is dit my beurt.
"Where do I pay", vra ek die een man. "You can pay me, sir, but only once you're on the other side, and safe" kom die antwoord glimlaggend. Elk met 'n band oor die skouer leun drie manne krom terwyl die skip voetjie vir voetjie langs die staalkabel oorgly. 'n Kennisgewingbord lees seker my gedagtes en waarsku dat die publiek nie mag hand bysit nie. 'n Skamele R15,00 later kom ons met 'n ligte stampie aan wal. Ek hoop maar hulle deel die paar rand kleingeld regverdig.
By Bredasdorp gekom merk ek dat Arniston/Waenhuiskrans net meer as 20km verder lê en ek gaan loer gou hoe die see daar lyk. Misgus my amper met 'n sandkol by die parkeerplek. Die bedompige seelug kleef al onder die ryklere en ek besluit om weer pad te vat. Die kaart toon 'n kortpad, Droëmelkbos/Prinskraal, en ek onthou ChrisL het onlangs melding gemaak hiervan. Nie ver gery nie gaan ek verby 'n ouerige kêrel wat effens mank langs 'n trapfiets loop. Pap agterband merk ek in die verbygaan.
Ek draai om en gaan stop langs hom. Dis tubeless tyres, verduidelik hy, maar hy wys my dat die sywand van die band gesny is, en hy het 'n snotwurm daar ingedruk maar sy gasbommetjies is gedaan. Hy het sy vrou probeer kontak maar weet nie of sy die boodskap gekry het nie. Hy't al 75km vandag gery en nou dit. Terwyl ek my pompie begin uithaal noem hy so terloops dat hy BMW motorfietse versamel, hy't blykbaar 'n stuk of agt van hulle, sy gunsteling die R80's. Hy't ook nog 'n kleinerige KTM waarmee hy nou en dan bietjie rondspeel. Ek kan agterkom hy's van daai effe koppige "never-say-die" tipe toppies. Ek hou van hulle. Maar toe hy vir my sê hy't al vier keer aan die Dakar ook deelgeneem begin wonder ek so bietjie.
Kort daarna kom sy vrou daar aan met die kar. "You BMW people have a strange way of always finding each other!" sê sy toe sy uitklim en sy bied koue drinkwater aan. Fiets vasgemaak op 'n fietsrak groet ons en word ek vreeslik bedank vir my hulp (al het ek toe ook maar niks gedoen nie). Ek vra hom sy naam: Neville Murray. Die naam klink verlangs bekend, en agterna by die huis Google ek dit en sowaar, die man is 'n Dakar veteraan.
Struisbaai. Nogals groter as wat ek gedink het sê ek vir myself en draai af rigting Agulhas. Eers verby die vuurtoring, ek wil daar by daai klipbaken gaan staan, die suidpunt van Afrika. 'n Oom speel gou vir my fotograaf voordat ek moet eenkant toe staan vir 'n groep Duitsers wat ook hulle beurt afwag. Sonder 'n ware ontbyt begin die honger homself nou lastig maak, en terug in Struisbaai gaan sit ek by die Bistro in die hoofstraat. 'n Malva en 'n palm baklei in dieselfde pot, en die tralies op die stoepie het ook al moed opgegee teen die seelug. Na Suidwes se trots kom die burger. Nou nie in dieselfde klas as die Dwarsbar s'n nie, maar hy sit my darem weer op die pad.
Kort buite Struisbaai draai ek links af op die Elim pad. Later swenk hy weer terug, ooswaarts verby Heuningrug tot net voor Bredasdorp. Daar deur vat ek die R319 rigting Swellendam, maar net oor die Soesrivier draai ek weer links af na Protem. Later, in die area van Leeuwkop, moes ek my beplande uitdraai noord gemis het, maar iedergeval hou ek voort en sluit weer by die R319 aan. Sowat 12km later draai ek links op die N2, en weer regs af by Stormsvlei waar ek eers aandoen vir 'n koeldrank. 'n Paar plaaslike manne is reeds gevestig om die kroegtoonbank.
Laaste paar kilometer tot op Bonnievale. Aangekom by swaer-hulle word ek gegroet met 'n koue bier. Die kinders baljaar in die swembad en die wasmasjien-balie brand al hoog. 'n Lekker 440km vir die dag en baie van die Overberg se paaie en plekke gesien. Beslis nie my laaste keer nie!
So gisteroggend vroeg is vrou en kinders met die Atos, en ek met die motorfiets, hier deur en op Barrydale draai ek weg oor die Tradouwspas. Graag sou ek darem dié pas wou gery het in die dae toe dit nog grondpad was. Natuurlik gebou deur pasmeester Thomas Bain, van 1869 tot 1873.
By Buffeljags blaas ek solank die bande 'n knertsie af, en kort daarna vurk ek links uit op die Malgas pad. Vaalbruin saailande en 'n paar skaap hou my geselskap voordat die pad skielik afkronkel na die groen rivieroewer. Malgas Pond. Eers 'n Volkswagen kombi met Gautengse toeriste wat oorgetrek word, dan is dit my beurt.
"Where do I pay", vra ek die een man. "You can pay me, sir, but only once you're on the other side, and safe" kom die antwoord glimlaggend. Elk met 'n band oor die skouer leun drie manne krom terwyl die skip voetjie vir voetjie langs die staalkabel oorgly. 'n Kennisgewingbord lees seker my gedagtes en waarsku dat die publiek nie mag hand bysit nie. 'n Skamele R15,00 later kom ons met 'n ligte stampie aan wal. Ek hoop maar hulle deel die paar rand kleingeld regverdig.
By Bredasdorp gekom merk ek dat Arniston/Waenhuiskrans net meer as 20km verder lê en ek gaan loer gou hoe die see daar lyk. Misgus my amper met 'n sandkol by die parkeerplek. Die bedompige seelug kleef al onder die ryklere en ek besluit om weer pad te vat. Die kaart toon 'n kortpad, Droëmelkbos/Prinskraal, en ek onthou ChrisL het onlangs melding gemaak hiervan. Nie ver gery nie gaan ek verby 'n ouerige kêrel wat effens mank langs 'n trapfiets loop. Pap agterband merk ek in die verbygaan.
Ek draai om en gaan stop langs hom. Dis tubeless tyres, verduidelik hy, maar hy wys my dat die sywand van die band gesny is, en hy het 'n snotwurm daar ingedruk maar sy gasbommetjies is gedaan. Hy het sy vrou probeer kontak maar weet nie of sy die boodskap gekry het nie. Hy't al 75km vandag gery en nou dit. Terwyl ek my pompie begin uithaal noem hy so terloops dat hy BMW motorfietse versamel, hy't blykbaar 'n stuk of agt van hulle, sy gunsteling die R80's. Hy't ook nog 'n kleinerige KTM waarmee hy nou en dan bietjie rondspeel. Ek kan agterkom hy's van daai effe koppige "never-say-die" tipe toppies. Ek hou van hulle. Maar toe hy vir my sê hy't al vier keer aan die Dakar ook deelgeneem begin wonder ek so bietjie.
Kort daarna kom sy vrou daar aan met die kar. "You BMW people have a strange way of always finding each other!" sê sy toe sy uitklim en sy bied koue drinkwater aan. Fiets vasgemaak op 'n fietsrak groet ons en word ek vreeslik bedank vir my hulp (al het ek toe ook maar niks gedoen nie). Ek vra hom sy naam: Neville Murray. Die naam klink verlangs bekend, en agterna by die huis Google ek dit en sowaar, die man is 'n Dakar veteraan.
Struisbaai. Nogals groter as wat ek gedink het sê ek vir myself en draai af rigting Agulhas. Eers verby die vuurtoring, ek wil daar by daai klipbaken gaan staan, die suidpunt van Afrika. 'n Oom speel gou vir my fotograaf voordat ek moet eenkant toe staan vir 'n groep Duitsers wat ook hulle beurt afwag. Sonder 'n ware ontbyt begin die honger homself nou lastig maak, en terug in Struisbaai gaan sit ek by die Bistro in die hoofstraat. 'n Malva en 'n palm baklei in dieselfde pot, en die tralies op die stoepie het ook al moed opgegee teen die seelug. Na Suidwes se trots kom die burger. Nou nie in dieselfde klas as die Dwarsbar s'n nie, maar hy sit my darem weer op die pad.
Kort buite Struisbaai draai ek links af op die Elim pad. Later swenk hy weer terug, ooswaarts verby Heuningrug tot net voor Bredasdorp. Daar deur vat ek die R319 rigting Swellendam, maar net oor die Soesrivier draai ek weer links af na Protem. Later, in die area van Leeuwkop, moes ek my beplande uitdraai noord gemis het, maar iedergeval hou ek voort en sluit weer by die R319 aan. Sowat 12km later draai ek links op die N2, en weer regs af by Stormsvlei waar ek eers aandoen vir 'n koeldrank. 'n Paar plaaslike manne is reeds gevestig om die kroegtoonbank.
Laaste paar kilometer tot op Bonnievale. Aangekom by swaer-hulle word ek gegroet met 'n koue bier. Die kinders baljaar in die swembad en die wasmasjien-balie brand al hoog. 'n Lekker 440km vir die dag en baie van die Overberg se paaie en plekke gesien. Beslis nie my laaste keer nie!
Attachments
-
02 - TRADOUWSPAS.JPG145.2 KB
-
03 - TRADOUWSPAS.JPG183.6 KB
-
04 - TRADOUWSPAS RIVIER.JPG184.5 KB
-
05 - BUFFELJAGS NA MALGAS.JPG103.9 KB
-
06 - BY MALGAS.JPG140.6 KB
-
07 - MALGAS POND.JPG161.6 KB
-
08 - MALGAS POND.JPG120.9 KB
-
09 - MALGAS POND.JPG131.5 KB
-
10 - MALGAS POND.JPG143.3 KB
-
01 - Lds tot Agulhas.jpg214.4 KB